Улуттук коопсуздук мамлекеттик комитети (УКМК) Ош облустук капиталдык курулуш башкармалыгынын мурдагы жетекчиси Ж.А.Ж., башкы инженер Т.Д.Ж., башкы эсепчи К.С.О. менен жалданма компаниянын жетекчиси А.К.Б. кармалганын билдирди. Атайын кызмат тараткан маалыматта алар Кең-Сай массивин жол, суу жана электр энергиясы менен камсыздоо үчүн берилген каражаттын максатсыз пайдаланышына, кымырылып кетишине айыпталып жатат.
“Жогорудагы курулуш иштерин жүргүзүү үчүн бюджеттен 657 045 900 сом каралган. Бүгүнкү күнгө карата келтирилген зыяндын суммасы 115 407 828 сомду түздү. Капиталдык курулуш башкармалыгынын кызмат адамдары ишенимдүү кишилери аркылуу бөлүнгөн бюджеттик каражаттардан "откат" түрүндөгү сый акыларды такай алып турган. Анын кесепетинен курулуш создугуп, иштер сапатсыз болуп, убагында жасалган эмес”, - деп жазылган маалыматта.
Бир катар басылмалар кармалгандардын бири мурдагы башкы прокурор Өткүрбек Жамшитовдун атасы Асилбек Жамшитов экенин жазышты. Анын жактоочусу жана жакындары азырынча комментарий бере элек.
Ушул айдын башында УКМКнын төрагасы Камчыбек Ташиев Ошто мамлекеттик кызматкерлерди чогултуп жыйын өткөргөндө Кең-Сай конушуна 2011-жылы 800 млн сом каралып, анын 260 млн сому максатсыз корогонун айтып, ага атышы бар адамдарды жоопко тартууну тапшырган.
Өткүрбек Жамшитов 2018-2020-жылдары Сооронбай Жээнбеков президент болуп турганда башкы прокурор кызматын аркалаган.